Астана қаласындағы Дарынды ер балаларға арналған «Білім-инновация» лицей-интернатының 10«А» сыныбы оқушылары тарих пәнінен «Қазақ хандығының құрылуы» тақырыбында ашық сабақ өткізді. Дәрісте олар ойын еркін әрі ұғынықты жеткізу үшін ерекше тәсілді қолданды. Яғни, PBL әдісін пайдалану арқылы «Қазақ хандығы» диорамасын көпшілік назарына ұсынып, таныстырды. Шәкірттер Қазақ хандығының құрылған мезгілі XV ғасырдың екінші жартысындағы тарихи жағдайлар жөнінде мәлімет берді.

1-наурыз күні Астана қаласындағы Дарынды ер балаларға арналған «Білім-инновация» лицей-интернатының ұжымы мен оқушылары Алғыс айту күнін атап өтті. Әсіресе, шәкірттер белсенділік танытып, арнайы қойылған стэндтердегі қағазға ұстаздарына деген риясыз көңілі мен кіршіксіз пейілін білдіріп, тілек жазды. Сонымен қатар, лицей ішінде әдемі шарлар, ал тыста қала тұрғындарына ыстық шай таратылды. Мұндай игі шара талай жүрекке мейірім шуағын шашқаны анық.

25-26 ақпан күндері Павлодарда химия пәнінен А.Бектұров атындағы V Халықаралық олимпиада өтті. Білім додасында еліміздің 12 өңірінен келген 87 оқушы 19 команда құрамында бақ сынады. Қатысушылардың арасында республикалық және халықаралық олимпиадалардың жеңімпаздары мен жүлдегерлері де болды. Кілең білімпаздар бәсекеге түскен сайыста Астана қаласындағы Дарынды ер балаларға арналған «Білім-инновация» лицей-интернатының 11-сынып оқушысы Қайратбек Абылай екінші орынды жеңіп алды. Лицей шәкіртін жетістігімен құттықтаймыз!

Астана қаласындағы Дарынды ер балаларға арналған «Білім-инновация» лицей-интернатының 10-11-сынып оқушылары арасында «Ауған алауы жадымызда» атты әскери-спорттық жарыс өтті. Кеңес Одағы әскерінің Ауғанстан жерінен шығарылғанына 30 жыл толуына арналған шарада шәкірттер бірнеше топқа бөлініп, түрлі тапсырмаларды орындау арқылы сайысқа түсті. Бұл жарыс оқушылардың патриоттық сезімін арттырумен қоса, салауатты өмір салтын насихаттады.

Астана қаласындағы Дарынды ер балаларға арналған «Білім-инновация» лицей-интернатына актер, КТК ойыншысы Нұрдәулет Шертім қонаққа келіп, оқушылармен кездесті. Ол әдемі әзілдерімен жас көрермендерінің езуін жидырмай, көтеріңкі көңіл-күй сыйлады. Сондай-ақ, басынан өткерген қызықты оқиғаларын айтып беріп, лицей шәкірттерін ду күлдірді. Кездесуден соң, оқушылар актермен естелік суретке түсті.

Астана қаласындағы Дарынды ер балаларға арналған «Білім-инновация» лицей-интернатының шәкірттері шет-шетінен қабілетті әрі жан-жақты. Мәселен, 7-сынып оқушысы Алихан Ақаев хоккейден жаттығу жиынына қатысты. Сонымен қатар, ол химия пәнінен 23-ақпанда Ресей Федерациясы құрамындағы Татарстанның астанасы Қазанда өткен Бүкілсібірлік ашық олимпиадада бақ сынады. Айта кетейік, бұл білім сайысы 8-сынып шәкірттері арасында ұйымдастырылады. Ал Алихан іріктеу кезеңінде жүлдегер болғандықтан, 7-сыныпта оқыса да, аталған олимпиадаға қатысуға жолдама алған еді. Оған дейін ешбір қазақстандық 7-сынып оқушысы бұл халықаралық білім додасына қатыспаған болатын.

Астана қаласындағы Дарынды ер балаларға арналған «Білім-инновация» лицей-интернатының ұжымы оқушылардың оқу үлгерімі мен білім сапасын үздіксіз жетілдіріп отыруға айрықша мән береді. Сол себепті, 23-ақпан күні 7-8-сынып оқушылары ата-аналарына мектепте педконсилиум ұйымдастырылды. Олар педконсилиум барысында пән мұғалімдерімен жеке-жеке сөйлесіп, оқушының сабағын жақсартып одан әрі дамытудың жолдарын қарастырды. Бұл шара алдағы уақытта жемісін беріп, шәкірттердің сабағы одан сайын жақсара түседі деген сенім мол. Сонымен қатар, педконсилиум ата-аналар мен ұстаздар арасындағы өзара байланысты нығайта түскені де анық.

Астанадағы Дарынды ер балаларға арналған «Білім-инновация» лицей-интернатына Гонконгтегі «PolyU» университетінің өкілдері қонаққа келіп, мектептің тыныс-тіршілігімен танысты. Айта кетейік, аталған жоғары оқу орны әлемдегі ең үздік жүз университеттің тізімінде бар. Лицей қонақтары ұстаздармен сұхбаттасып, пікірлерімен бөлісті. Сонымен қатар, оқушылармен де кездесіп, ғылым мен технология саласында болып жатқан соңғы жаңалықтар мен ақыл-кеңестерін айтты.

Астана қаласындағы Дарынды ер балаларға арналған «Білім-инновация» лицей-интернатының ұжымы мен шәкірттері үшін адам өмірі бәрінен құнды. Сол себепті, 19 ақпан күні Байқоңыр аудандық өрт сөндіру басқармасының бастығы, подполковник Еркін Отарғалиұлы қарамағындағы қызметкерлерді бастап келіп, мектеп әкімшілігімен бірге арнайы шара ұйымдастырды. Онда мамандар оқушыларға өрт қауіпсіздігі ережелерін сақтаудың мән-маңызын түсіндірді. Сонымен қатар, төтенше жағдайда қалай әрекет ету керек екенін айтып берді. Байқоңыр аудандық өрт сөндіру басқармасының бастығы, подполковник Еркін Отарғалиұлы лицей ұстаздарымен сұхбаттасып, жоғарыда аталған мәселе бойынша ой бөлісті. 

Астана қаласындағы Дарынды ер балаларға арналған «Білім-инновация» лицей-интернаты «Жұлдыздар шеруі – 2019» салтанатты марапаттау рәсімін ұйымдастырды. Онда 2018-2019 оқу жылының алғашқы жартысында жетістікке жеткен оқушыларға және олардың ұстаздары мен ата-аналарына құрмет көрсетілді. Салтанатты шара барысында жиналған қауым бір минут үнсіздік арқылы жуырда Астанада өртенген үйде қайтыс болған өрімдей бес қызды еске алды. Содан соң жүргізушілер марапаттау рәсімінің қонақтарымен таныстырды. Олар: Астана білім басқармасының өкілі және бас маманы Асыл Амангелдіқызы, «Астана дарыны» дарындылықты дамыту және психологиялық сүйемелдеу орталығының директоры Майра Жаноразқызы, «Білім-Орда» қорының президенті Дарханбек Қожабеков, Қамқорлық кеңесінің төрағасы Аскер Пириев, «Нұрорда» мектебі директорының оқу ісі жөніндегі орынбасары Қуат Қожахметов. Дәстүрлі түрде өткізілетін марапаттау үрдісін бастамастан бұрын лицей директоры сөз алып, дарынды оқушыларға осы бағытттан таймай, еңбектене беруіне кеңес беріп, үлкен жеңістерге толы жарқын болашақ тіледі. Мектеп басшысының сөзінен кейін сахнаға Қамқорлық кеңесінің төрағасы Аскер Пириев шығып, «БИЛ болашағы – 2019» аталымы бойынша 23 аудандық олимпиада жеңімпазы мен жүлдегеріне арнайы мақтау қағазын табыстады. Әуезді күй орындалып, жұрт бір серпіліп алған соң, «БИЛ мақтанышы – 2019» аталымымен 30 шәкірт марапатталды. Олар мақтау қағазын математика ғылымдарының докторы, Ы. Алтынсарин атындағы төсбелгі иегері ұстаз Муаммер Гүлдің қолынан алды. «БИЛ мақтанышы – 2019» аталымы бойынша тағы 24 оқушыға «Білім-Орда» қорының президенті Дарханбек Қожабеков құрмет көрсетті. 
Орайы келгенде, айта кетейік, 2019 жылғы қалалық пән олимпиадасында «Білім-инновация» лицейінің оқушылары 49 жүлделі орынды иеленіп, Астана қаласының үздік олимпиада командасы болды. Мектептің осындай ірі табысқа жетуіне үлес қосқан жас білімпаздар да кеште басты назарда болды. Атап айтқанда, лицей директоры Жеңіс Жұмабайұлы 31 оқушыға «БИЛ көшбасшысы – 2019» атағын берді. Одан әрі «Астана дарыны» дарындылықты дамыту және психологиялық сүйемелдеу орталығының директоры Майра Жаноразқызы «БИЛ жұлдызы – 2019» аталымымен 17 шәкіртті марапаттады. Олар – лицейдің ғана емес, күллі елдің атын шығарып, халықаралық білім додаларында биіктен көрінген талапты жастар. Астана білім басқармасының өкілі және бас маманы Асыл Амангелдіқызы және жеті «БИЛ жұлдызы – 2019» аталымы иегерін ортаға шақырып, көпшілікке таныстырды. Олардың қай-қайсысы да халықаралық сайыстарда Қазақстан туын биікте желбіреткен дарынды жастар. Шәкірттерге мақтау қағазын табыстап болған соң, лицей директоры Жеңіс Жұмабайұлы тұлпарын баптаған атбегідей жылдар бойы шәкірттерін білім бәйгесіне дайындап, додаға қосқан ұстаздарды марапаттады. Сондай-ақ, мектептің қоғамдық өміріне белсенді араласып, лицей ұжымына қолғабыс етіп жүрген ата-аналар да назардан тыс қалған жоқ. Олар да арнайы мақтау қағазына ие болды. 
Елбасы Нұрсұлтан Назарбаевтың «Білімді ұрпақ – қашан да ел тірегі» деген сөзіне жүгінсек, Астана қаласындағы Дарынды ер балаларға арналған «Білім-инновация» лицей-интернатынан түлеп ұшқан талай білімді жас Отанының дамуына зор үлес қосатыны шүбәсіз.

Астана қаласындағы Дарынды ер балаларға арналған «Білім-инновация» лицей-интернатының ұжымы мен оқушылары жыл сайын қаңтар айында қайырымдылық шараларын ұйымдастырады. Бұл игі дәстүр биыл да жалғасын тапты. «Жаныңда жүр жақсы адам» акциясы аясында лицей ұстаздары мен шәкірттері қаладағы әлеуметтік жағдайы төмен 15 отбасыға көмек қолын созды. Яғни, қажетті азық-түлігі мен киім-кешегін апарып берді. Мұқтаж жандарға жәрдемдесумен бірге, оқушыларды мейірімділік пен көпшілдікке тәрбиелейтін бұл шара әлі бір аптаға созылады.

Астана қаласындағы Дарынды ер балаларға арналған «Білім-инновация» лицей-интернатына белгілі суретші Ренат Елубаев қонаққа келіп, оқушылармен кездесті. Кездесу барысында ол сурет салып көрсетіп, жас жеткіншектерді өнерімен тәнті етті. Сондай-ақ, бейнелеу өнерінің қыр-сыры, тарихы және атақты суретшілер жөнінде айтып берді. Ең бастысы, Ренат мырза адамгершілік қағидаттары жөнінде тағылымды әңгіме өрбітіп, шәкірттерді арлы, адал болуға үндеді. Сонымен қатар, жас талапкерлерге мамандық таңдауда қателеспеуге кеңес беріп, ой салды.

23-қаңтар күні Астана қаласындағы "Нұр әлем" павильонында "Тәуелсіздіктің ұрпақтары" атауымен жастар жылының ашылу салтанаты өтті. Мемлекет басшысының қатысуымен өткізілген бұл іс-шараға мектебіміздің 10-сынып оқушысы, математика пәні бойынша халықаралық олимпиадалардың бірнеше дүркін жүлдегері Дүйсенбеков Данат та қатысты.

19-25 қаңтар аралығында Астана қаласында «Парасат-2019» атты зияткерлік сайыс өтті. Бұл байқауға 70 мектептің оқушылары қатысып, бақ сынады. Біздің лицейдің шәкірттерінен жасақталған «БИЛ қырандары» тобы әуелі аймақтық кезеңде үздік атанып, Байқоңыр ауданынан қатысқан 12 мектептің оқушыларына дес берген жоқ. Келесі саты қалалық кезең 25-қаңтарда ұйымдастырылды. Мұнда да Астана қаласындағы Дарынды ер балаларға арналған «Білім-инновация» лицей-интернатының шәкірттері өте жоғары деңгейде өнер көрсетіп, білімділігі мен тапқырлығын көрсете білді. Соның арқасында жүлдерлі 2-ші орынды жеңіп алып, қала мектептерінің арасында лицейіміздің абыройын асқақтатты. Лицей директорының бейіндік ісі жөніндегі орынбасары Гүлнар Рахимова жетекшілік еткен топ мүшелері – Сұлтан Әшімов, Мағжан Дәуітов, Жандос Бақытов, Жеңіс Болсын және Болат Қожамжаровты жеңісімен құттықтай отырып, лицей атынан алғыс білдіреміз. Айта кетейік, оқушылардың ой өрісі, таным көкжиегі сынға түсетін аталған зияткерлік сайыс енді жыл сайын дәстүрлі түрде өткізілмек.

Қазақта «Ауырып ем іздегенше, ауырмаудың жолын ізде» деген сөз бар. Сол себепті, еліміздің әр мектебінде, соның ішінде біздің лицейде де қызметкерлер мен оқушыларға қызылшаға қарсы вакцина егіледі. Нәтижесінде, адам ағзасында аталған ауруға төтеп беретін иммунитет пайда болады. Қызылшаның алғашқы белгілерін де жазып өтейік: әлсіздік, тәбеттің болмауы, құрғақ жөтел, дене қызуы. Бірер күннен соң денеде қызыл дақтар пайда болады. Өзіңізден мұндай белгілерді байқасаңыз, бірден дәрігерге қаралуға кеңес береміз. Қызылшаны асқындырып алсаңыз, қауіпті ауруларға ұласуы мүмкін екенін ескеріңіз.

Астана қаласында 17-қаңтар күні Л. Н. Гумилев атындағы Еуразия ұлттык университеті базасында мектеп оқушылары арасында ағылшын тілінен олимпиада ұйымдастырылды.  Аталған жарысқа Дарынды ер балаларға арналған «Білім-инновация» лицей-интернатының  10-11-сынып оқушылары қатысты. Олимпиада нәтижесі бойынша Серікбеков Архат 2-орынға ие болса,  көрсеткен ерекше жетістіктері үшін Нұрмұқанов  Жандос  пен Ақмұрат Дәуіржан мақтау қағазымен марапатталды. Оқушыларды және жарысқа дайындаған ағылшын тілі пәні мұғалімі Сейілбаева Мөлдір Бекетаевнаны жеткен жоғары жетістіктерімен шын жүректен құттықтаймыз!

16-қаңтар күні ҚР Парламентінің Мәжіліс депутаты Ирина Смирнова мен Астана қаласы ата-аналар қауымдастығының төрайымы Гүлнар Омарова лицейімізге келіп, мектеп ұжымымен кездесті. Кездесу екіжақты пікір алмасу түрінде өрбіп, қоғамдағы мұғалім мәртебесі жайлы келелі әңгіме айтылды.

Астана қаласындағы Дарынды ер балаларға арналған «Білім-инновация» лицей-интернатында ата-аналар комитетінің жиналысы өтті. Жиналыс барысында I жартыжылдықтың қорытындысы, CIS ұйымына өтудің мақсаттары мен міндеттері және оқушыларға білім мен тәрбие берудегі лицей жоспары көпшілік назарына ұсынылып, талқыланды.

Астана қаласындағы Дарынды ер балаларға арналған «Білім-инновация» лицей-интернатына «Халықаралық бағдарламалар орталығы» АҚ президенті Жанболат Мелдешов қонаққа келіп, оқушылармен кездесті. Ол дамыған мемлекеттердің алдыңғы қатарлы университеттерінде оқудың артықшылықтары мен оларға оқуға түсудің жолдарын түсіндірді. Әлемнің ең үздік жоғары оқу орындарында білім алу үшін жас талапкерлерді ағылшын тілін жетік меңгеруге және еңбекқор, ізденімпаз болуға шақырды. Шәкірттердің арманына қанат бітірген кездесуде тағылымды әңгімелер айтылды.

2019 жылдың 9-15 қаңтар аралығында Алматы қаласында XV Халықаралық Жәутіков олимпиадасы өтті. Халықаралық Жәутіков олимпиадасы Қазақстандағы беделді білім беру іс-шараларының бірі болып табылады. Олимпиадаға әлемнің 18 елінен 525 мектеп оқушысы қатысты. Жарыс нәтижесінде Астана қаласының командасы өте жоғары жетістіктерге қол жеткізді. Соның ішінде, Дарынды ер балаларға арналған «Білім-инновация» лицей-интернатының 6 оқушысы жүлделі орынға ие болды. Математика пәні бойынша Есенгелді Нұрдаулет, Ашкен Абылай, Раушанов Марлен күміс медальмен марапатталса, Каришев Шыңғыс пен Сейдалы Сұлтанали қола медаль иегері атанды. Ал, информатика пәні бойынша Маулен Манас қола медальмен марапатталды. Жүлдегер оқушыларымызды, дайындаған ұстаздарын және ата-аналарын құттықтаймыз!